 من هو الخليفة E ولأيش بطمح؟انا خليفة E عيسى من الناصرة. تعلمت في الناصرة في مدرسة الأميركان... أنا زي كل شاب عمره 20 سنة، حلمي اصل للعرب اللي برّه بعد اكم سنة، واوصلهن أنا كفلسطيني عايش باسرائيل انو انا مش خاين، وانو انا بغدر اصل واحكي اللي بداخلي بدون خوف.
هل بتفكر انو اغاني الراب العربي نابعة من معاناة وألم، ام هي بس مجرد تقليد للغرب؟
بفكر انو اغاني الراب نابعة من معاناة وألم... اذا أنا عندي وين أنام بالليل وكيف آكل، هدا بقلش انو انا مش عايش بمعاناة، لأنو كل واحد منا في عندو معاناة معينة... بالنسبة لتقليد الغرب، أنا بفكر انو الموسيقى هي لغة العالم... التقليد لهدف منيح مش سلبي... والهدف هونا مش التقليد، الا التعبير عن احساس وهدف.
شو اللي بخلي الخليفة E يفضل اسلوب الراب عن باقي اساليب الغناء؟
اسلوب الراب اسلوب حر، مش مقيد ولا باي موضوع ولا بأي لغة... هادا الاسلوب حبيتو وانا صغير وحسيتو بعبر عني وانجذبت لإلو كتير. ولما لقيت شو عندي اكتب، كتبت وغنيت، وحسيت انو بلائم شخصيتي لأنو اسلوب صريح.
شو رأي الخليفة E بالاعلام العربي في البلاد؟
اعلام عربي في اسرائيل موجود... بس احنا منطالب انو يكون باسلوب اعلى وأحسن. مع انو السياسة مهمة بوقتنا واحنا مجبورين فيها كتير، هاد بقولش انو منهتمش بالمواهب والفن الموجودة عنا او بالاصح نبرزها.
 شو رأي الخليفة E ببرنامج "شو شباب" اللي بقدمو براديو الشمس؟"شو شباب" برنامج حلو، برنامج حر بحكي بلغة الشباب....اذا منشوف في مجتمعنا مكانش من قبل برنامج بهاي الحرية. أغلب البرامج بتكون مقيدة، ومحدد شو لازم يحكوا، حتى البرامج اللي بتحكي عن الشباب ما بتحكي لغة الشباب... السلبية الموجودة في البرنامج انو انا بكون في البرنامج حر اكثر عن اللازم والناس مش متعودة على هاي الحرية فبشوفوها بشكل سلبي.
وين أكثر محل بحب الخليفة E يعرض فيو؟
أكتر محل ممكن اتريح اني اعرض فيو، بعدني معرضتش فيو واللي نفسي اعرض فيو: هو خارج الخط الأخضر بجنين او رام الله. لأنو هدول الناس هني اللي بعطونا أمل انو ممكن تقوم دولة فلسطينية وهاي الناس اللي بتستحق الدولة... انا بدي أعرض قدام أهل جنين اللي هني ناس صامدين ومرقوا أحداث اللي احنا بس شوفناها بالتلفزيون... أنا بحس انو عندي شو احكيلهن... الهدف من العرض اني احاول ابسط الاطفال لو لمدة تلت ساعة وأقلهن انو عرب الداخل مش ناسيينهن، وبلكي بغدر اعطيهن شوية تفاؤل.
في اشاعات بتقول انو الخليفة E بدو يهاجر من البلاد، هادا صحيح؟
قصة انو أهاجر كمان ممكنة بس مش اسّا، لأنو بعد عندي كثير اشياء اساويها واحققها حتى اصل لهدفي.
 هل بتفكر انو ظاهرة الراب هي ظاهرة عابرة، ممكن تختفي مع الوقت؟انا بغدرش اضمن شو رح يصير، بس أنا بحكي عن حالي، انو طول ما عندي شو أحكي رح أحكي بدون توقف... رح أحكي باسلوب الراب وانا شايف انو عمرو طويل.
شو بتحب تقول لطلاب مدرسة الجليل الثانوية؟
اول اشي، انا بشكر الله انو غيمة العنصرية السودة مرقت، وبتفاخر كيف تغلبنا على هاي المرحلة وهدا بقول انو الناصرة موحدة بكل اشي... بالنسبة للمدرسة الثانوية، هي اكثر مدرسة بتمثل الناصرة بشكل واضح، منها تخرجوا كتير من المثقفين والمتعلمين.
وانشالله تضلوا مدرسة قوية... ونمرق كل التفرقة والعنصرية... وديروا بالكوا على بعض انتي وهوي وهيِّ... وتضل أقوى مدرسة، مدرسة الثانوية... من أخوكو الخليفة E أحلى تحية... | 
